狗狗刷牙3步曲

幫狗狗揀好牙刷牙膏之後，主人就可以開始幫狗狗刷牙護齒喇！好多主人都覺得幫狗狗刷牙好難搞～但其實只要follow 刷牙3步曲就可以輕輕鬆鬆幫狗狗「向上刷、向下刷～」

第1步：準備刷牙用具

‧一碗水，方便清潔狗狗牙齒用～
‧狗用牙膏
‧指套牙刷／帶柄牙刷

主人可以由準備用具開始就俾狗狗睇住你準備幫佢刷牙嘅過程，俾心理準備狗狗。

第2步：開始刷牙

開始前要將牙刷沾濕同擠好牙膏。當一切都準備就緒，主人要先輕輕用手掀開狗狗嘅嘴巴，將牙刷放入佢個口入面。當狗狗感受到有野放入左佢個口，佢可能會咬支牙刷。呢個時侯主人可以輕輕捉住狗狗嘅下顎，咁狗狗就唔會咬親你。記住呀～每刷完7-8隻牙齒就要拎隻牙刷出黎過一過水，再擠過新嘅牙膏幫狗狗繼續刷牙，直到刷哂每一隻牙仔為止：）

第3步：獎勵狗狗

無論狗狗刷牙期間有幾多掙扎都好，狗狗刷完牙之後主人一定要讚佢地乖，甚至俾少少健康小食（例如：每日刷完牙獎一支潔齒骨～加強護齒效果！）獎勵佢地～幫佢地建立良好嘅刷牙習慣。

幫狗狗刷牙唔單止可以幫佢地去除牙結石，仲可以有效預防牙周病添～所以要記住呢3步曲，多啲幫狗狗刷牙呀  ：）